MAANDALIZI YA MBIO ZA MWENGE MWAKA 2016 YAANZA WILAYANI KARAGWE

Maafisa watendaji wa kata wilayani Karagwe mkoani  Kagera wametakiwa kuhamasisha wananchi kuhakikisha wanachangia michango ya mbio za mwenge na utaratibu wa kuchangisha michango hiyo tayari umeshaanza wilayani humu.

Wito huo umetolewa leo na mkuu wa wilaya ya Karagwe Deodatus Kinawiro katika kikao cha maandalizi ya mbio za  mwenge kilichofanyika katika ukumbi wa halmashauri ya wilaya ya Karagwe.

Kinawiro amesema kuwa ni jukumu la maafisa watendaji wote wa kata kuhakikisha wanahamasisha wananchi kuchangia michango ya mbio za mwenge  kama ilivyopangwa na kupitishwa na wajumbe wa mbio za mwenge mwaka huu 2016 ambapo kila mwananchi,taasisi, na mashirika binafisi  watatakiwa kuchangia kama watakavyoelekezwa ili kuhakikisha mapokezi ya mbio za mwenge mwaka huu yanafanikiwa.

Amesema kuwa mwaka huu mwenge wa uhuru utakesha katika  mji mdogo wa Nyakaiga katika kata ya Kibondo  wilayani humu huku akieleza kuwa wameamua kufanya hivyo ili wananchi wengine  nao waweze kuona mwenge wa uhuru na sio kukaa wanausikia katika sehemu moja tu.

Hata hivyo amewataka madiwani nao kwa nafasi yao kutochanganya siasa na mwenge kwani mwenge wa uhuru ni kwa ajili ya maendeleo na ni kwa watanzania wote.

Akieleza katika kiko hicho cha maandalizi ya mbio za mwenge mratibu wa mbio hizo wilaya ya Karagwe Aloyce Mjungu ameeleza kuwa mwaka huu mwenge wa uhuru kwa wilaya ya Karagwe utapokelewa  tarehe 25 mwezi wa 07 mwaka huu katika kijiji cha Msabanga wilayani Ngara na ukiingia wilayani humu utatembelea miradi mbalimbali ya maendeleo inayopatikana katika wilaya hii na kuukabidhiwa kwa watu wa wilaya ya Kyerwa tarehe 26 mwezi  07 mwaka huu katika kijiji cha Ilega wilayani Kyerwa.

 Mjungu ameshukuru wananchi,na wadau wote waliofanikisha mbio za mwenge mwaka jana ambapo amesema kuwa wilaya ya Karagwe ilikuwa ya 6 kati ya wilaya 8 za mkoa huu wa Kagera, na nafasi  ya  31 kwa ngazi  ya kanda  kati ya  35,Pia wilaya ya Karagwe ilikuwa  ya 78 kitaifa  ambapo amesema  hatua hiyo ni nzuri na wanatamani mwaka huu wavuke katika hatua hiyo kama ushirikiano wa wananchi utakuwepo.