MBUNGE ATAKIWA KUMTEMBELEA BABA WA MTOTO MWENYE UALIBINO AMBAYE MWILI ULIIBIWA

Mbunge  wa  jimbo  la  Kyerwa  Innocent  Seba  Bilakwate  ameombwa  kufika  nyumbani  kwa  Begumisa Isaack kwa  ajili  ya  kuonesha  utu wa  kuwajali  watu  wenye  ualibino  kwasababu  ya  mateso  na  manyanyaso  wanayoyapata  kwenye  jamii.

Wito  huo  umetolewa leo na  mkurugenzi  wa  shirika  la  UNDER  THE  SAME  SUN  Vicky  Ntetema wakati  akiongea  na  wananchi  kupitia  Redio  Fadeco kufuatia  kuwepo  kitendo cha  kufukua  kaburi  la  mtoto  Magufuli  Begumisa  wa  kata  ya  Businde  wilayani  Kyerwa.

Amesema  Mbunge  wa  jimbo  la  Kyerwa  kuonesha  kuwa anawajibika  kwa  wananchi  wake  ni  vema  akafika  kwenye  eneo  la  tukio  kumjulia  hali  jambo  litakaloongeza  imani  kwa  watu  wenye  ualibino.

Ntetema  amesema  kuwa utashi  wa kisiasa  kwa  nchi  ya  Tanzania  haupo  kutokana  na  wabunge  kutoonesha  dalili  zozote  za  kuhamasisha  kutunga  walau  sheria  maalumu  ya  kuwathibiti watu  wanaojihusisha  na  vitendo  vya  kinyama  dhidi  ya  watu  wenye  ualibino.

Kwa  upande  wake Afisa ustawi  wa  jamii  Ester  Rwela katika  shirika  la  UNDER  THE  SAME  SUN amesema  jamii  inabidi  kuchukua  jukumu  la  kuhakikisha  dunia  inakuwa  mahali  salama  kwa  watu  wenye  ualibino  kwa  kutoa  ushirikiano  na  kuonesha  upendo  kwa  kuwachangia  baadhi  ya  gharama  za  afya ya  mwili  wao.

Hata  hivyo  VICKY  NTETEMA  amesema  jukumu la  ulinzi  dhidi  ya  watu  wenye  ualibino  ni  la  kila  mmoja  kwenye  jamii  na  kuwataka  wazazi  wenye  watoto  wenye  ualibino kutowatelekeza  kwenye  kambi  na  badala  yake  wawatembelee  na  serikali  inafanya  utaratibu  wa  kuwaweka kwenye shule  mchanganyiko  ili  kuwaondolea  imani  ya  kukaa  pekee  yao.