Mhe.
Major Jenerali Mstaafu Salum Mustafa Kijuu, Mkuu wa Mkoa,
Katibu Tawala wa Mkoa, Armantus Msole,
Wajumbe wa Kamati ya Ulinzi na Usalama,
Mhe. Mkuu wa Wilaya ya Bukoba Mjini, Deodatus Lucas
Kinawilo,
Mganga Mkuu wa Mkoa, Dkt. Thomas
Rutachunzibwa,
Mstahiki Meya Manispaa ya Bukoba - Chifu
Karumuna,
Mkurugenzi - Manispaa ya Bukoba,
Mkurugenzi wa Shirika la Jhpiego -
Tanzania, Jeremie Zoungrana,
Mwakilishi wa Shirika la Maendeleo la
Kimataifa la Marekani (USAID) - Tanzania,
Wajumbe wa Bodi ya Ushauri ya Hospitali,
Viongozi wa Dini,
Watumishi wa Hospitali ya Rufaa Mkoa wa
Kagera,
Wandishi wa Habari,
Wageni Waalikwa,
Mabibi na Mabwana.
Awali
ya yote, napenda kuchukua fursa hii kumshukuru Mwenyezi Mungu, mwingi wa rehema
kwa kunijalia fursa ya kuja kujumuika nanyi katika shughuli hii muhimu ya leo.
Pili, ninakushukuru wewe binafsi Mheshimiwa Mkuu wa Mkoa kwa kunialika ili
nijumuike nanyi katika tukio hili. Vile vile, nitumie fursa hii kukupongeza
sana kwa kuaminiwa na Rais wa Jamhuri ya Muungano wa Tanzania, Mheshimiwa John
Pombe Magufuli, kwa kukuteua kuwa Mkuu wa Mkoa wa Kagera. Hongera sana.
Wageni
Waalikwa,
Suala
la kuongeza usawa katika utoaji huduma za afya, ili kupunguza vifo vya wanawake
wajawazito pamoja na watoto wachanga na wale walio chini ya umri wa miaka
mitano, ni mojawapo ya vipaumbele vya Serikali ya awamu ya tano. Wote
tumeshuhudia msisitizo wa Mheshimiwa Rais katika kuhakikisha kuwa huduma za
afya zinaboreshwa hapa nchini. Ninawapongeza na kuwashukuru wote wanaounga
mkono juhudi za Serikali.
Wageni
Waalikwa,
Serikali
kwa kushirikiana na wananchi na wadau mbalimbali, imefanikiwa kupunguza vifo
vya watoto wenye umri chini ya miaka mitano kutoka vifo 166 kwa kila vizazi hai
1,000 mwaka 1990, hadi vifo 54 kwa kila vizazi hai 1,000 mwaka 2012, na hivyo
kufikia lengo namba tatu la Maendeleo ya Milenia. Kiwango cha vifo vya wanawake
wajawazito kilipungua kwa takriban nusu, kutoka vifo 870 kwa kila vizazi hai
100,000 mwaka 1990 hadi vifo 432 kwa kila vizazi hai 100,000 mwaka 2012 na
kushindwa kufikia lengo namba tano la maendeleo ya Milenia ambalo lililenga
vifo 193 kwa kila vizazi hai 100,000.
Kwa
Mkoa wa Kagera wastani wa wanawake wajawazito 70 hupoteza maisha kila mwaka.
Aidha, watoto wenye umri chini ya mwezi mmoja wapatao 280 - 300 hupoteza maisha
kila mwaka, na wastani wa watoto 980 wenye umri chini ya miaka mitano hufariki
kila mwaka. Hii ni kulingana na taarifa kupitia mfumo wa huduma za afya, upo uwezekano kuwapo kwa vifo visivyojulikana
katika ngazi ya jamii. Idadi hii ya vifo ni kubwa mno, hivyo ni jukumu letu
sote kuhakikisha tunaungana ili tuokoe maisha ya makundi haya muhimu.
Wageni
Waalikwa,
Mkakati
wa Wizara yangu katika kupunguza vifo vitokanavyo na uzazi, vifo vya watoto
wachanga na watoto chini ya miaka mitano unazingatia mambo ya msingi yafuatayo:
Kuboresha na kuongezea hadhi vituo vya
afya ambavyo vipo karibu na wananchi, ili viweze kutoa huduma za upasuaji wa
kutoa mtoto na damu salama.
Kuongeza upatikanaji wa damu salama.
Kuhamasisha wanawake wajawazito kujifungulia
katika vituo vya kutolea huduma ya afya. Ili kuvutia wanawake wajawazito
kujifungulia katika vituo vya kutolea huduma ya afya, Vituo hivi vimeagizwa
kuwa na wodi za kujifungulia zinazokidhi viwango na ubora unaokubalika, vifaa
tiba na vitendea kazi vya kutosha.
Aidha, serikali inatoa kifurushi cha vifaa muhimu vinavyotumika wakati
wa kujifungua, vifaa hivi hutolewa wakati mama anahudhuria kliniki, ili
kumuondolea adha ya kuagizwa kununua vifaa wakati anapokwenda kujifungua na
kama kivutio cha kujifungulia katika vituo vya kutolea huduma ya afya. Kwa sasa
huduma hii inatolewa katika mikoa sita ya Kagera, Mara, Geita, Mwanza, Simiyu
na Shinyanga kanda ya ziwa, na lengo ni kuifikia mikoa yote.
Kuhakikisha kuwa wanawake wajawazito
wanahudhuria kliniki ya wajawazito angalau mara nne, ili waweze kuchunguzwa
afya zao kwa minajiri ya kutambua viashiria vya hatari, na magonjwa ili kuanza
tiba kama itakavyohitajika. Pia, wajawazito hupewa dawa za kuzuia malaria,
chanjo ya kuzuia pepopunda, pamoja na kupewa ushauri nasha na kupima magonjwa
ya kuambukiza kama UKIMWI, Kaswende, na kwa wale watakaogundulika kuwa
wameathirika hupewa huduma hapo hapo.
Kuhakikisha kuwa jamii inatumia njia za
kisasa za uzazi wa mpango, ili kuepuka mimba zisizotarajiwa kwa lengo la kupunguza vifo vitokanavyo na
uzazi na vifo vya watoto wachanga.
Kuhamasisha na kushirikisha jamii katika
kupanga na kutekeleza mambo yanayohusu afya ya mama na mtoto.
Kushirikisha wadau mbalimbali yakiwemo
mashirika ya umoja wa mataifa, mashirika ya dini, mashirika yasiyo ya
kiserikali na watu binafsi katika masuala yanayohusu afya ya mama na motto.
Wageni
Waalikwa,
Kwa
niaba ya Serikali napenda kutoa shukrani za dhati kwa wadau wetu wote,
wanaounga mkono juhudi za serikali kuhakikisha kuwa haya yote yanatekelezwa
kama ilivyopangwa. Nimepata taarifa ya kazi kubwa ya wadau wa afya katika Mkoa
wa Kagera, wakiwemo:
"Management and Development for
Health" (MDH), kwa upanuzi wa Zahanati huko Muleba na katika Halmashauri
ya Wilaya ya Bukoba.
Ninatambua kazi nzuri ya ujenzi wa kituo cha
benki ya damu salama cha Mkoa wa Kagera, pamoja na ghala la kuhifadhia vifaa
vya chanjo linayoendelea ndani ya Hospitali hii ya mkoa, chini ya ufadhili wa
Shirika la Umoja wa Mataifa la Idadi ya watu - UNFPA.
Nimepata taarifa kuwa ICAP imefanya kazi kubwa
katika eneo la kudhibiti UKIMWI katika Mkoa huu kwa zaidi ya miaka kumi sasa,
ninawapongeza sana kwani takwimu zinaonyesha kuwa kiwango cha maambukizi
kinashuka katika Mkoa wa Kagera. Pia, Shirika la ICAP limefanya upanuzi wa
miundombinu katika baadhi ya vituo vikiwemo Hospitali hii ya Mkoa, Kituo cha
Afya Kaigara (Muleba), na Nyakahura
Ninatambua mchango wa kila mdau: Abott
Associates, Amref, TCDC, Red Cross, Marie Stopes na Engender Health.
Wageni
Waalikwa,
Kwa
tukio hili maalum la leo, kipekee napenda kuwapongeza shirika la Jhpiego,
ambalo pamoja na kushiriki katika maeneo
mengine ya afya hapa nchini, ndilo limefadhili kazi ya upanuzi na ukarabati wa
wodi hii ya wazazi katika Hospitali ya Rufaa ya Mkoa wa Kagera. Kukamilika kwa ukarabati huu, kumeifanya wodi
hii kuwa ya kisasa inayomuwezesha mama mjamzito kujifungua katika mazingira
safi na salama. Nimetaarifiwa kuwa kabla ya upanuzi huu, wazazi walikuwa
wanalala chini tena kwa kubanana hali inayopelekea kuambukizana magonjwa. Ukarabati huu ni matunda ya ziara
ya Rais wa Jhpiego Dkt. Leslie Mancuso, aliyoifanya hapa mwezi wa Aprili, 2016
na kuguswa na msongamano wa wajawazito katika wodi ya wazazi. Naambiwa kazi
kama hii imefanyika katika Hospitali ya rufaa ya Mkoa wa Mara. Juhudi hizi
zinanipa faraja kuwa huduma zetu zitawafikia wanawake wajawazito wengi zaidi.
Nimetaarifiwa
kuwa, wodi hii imeanza kutumika japo kuna upungufu wa vitanda, tunaomba tuzidi
kushirikiana ili vitanda vipatikane.
Wageni
Waalikwa,
Upanuzi
huu uliofanyika ni sehemu katika kuboresha utoaji wa huduma kwa wazazi. Lengo
la Serikali ni kupanua wodi ya kujifungulia ambazo ni ndogo, kujenga vyumba vya
upasuaji kwa ajili ya wajawazito pekee, pamoja na kujenga wodi maalum ya watoto
wachanga. Kazi hii ni kubwa, hivyo tunahitaji nguvu ya pamoja na ushirikiano wa
wadau wote mliopo hapa leo. Nimeambiwa upo mkakati wa kufanya harambee ya
kuchangia miradi hii pamoja na ujenzi wa nyumba za watumishi. Ninaomba kila
mmoja wetu achangie chochote katika kutekeleza mradi huu.
Tukishirikiana
na tukajitolea tutaweza kubadilisha huduma za afya zilizopo sasa.
Wageni
Waalikwa,
Ninatambua
kazi kubwa inayotekelezwa chini ya mradi wa Maternal and Child Survival
Programe (MCSP) ikiwa ni pamoja na; kutoa mafunzo ya uzazi salama kwa wataalam
wa Afya, huduma ya uzazi wa mpango, mafunzo kwa Wahudumu wa Afya ngazi ya
Jamii, kuboresha wa upatikanaji na matumizi ya takwimu za afya kwa ajili ya
mipango ya afya. Mambo yote haya yanasaidia kuboresha huduma za mama na mtoto
kwa lengo la kuzuia vifo na ulemavu.
Kutokana
na kazi hii nzuri, ninapenda kurudia kulishukuru Shirika la Jhpiego kwa kuamua
kuja Mkoa wa Kagera kushirikiana na Mkoa huu kuboresha huduma za afya ya mama na mtoto.
Wageni
Waalikwa,
Serikali
kwa kushirikiana na wadau wa sekta ya afya itaendelea kuwajengea uwezo watoa
huduma kuweza kutoa huduma za dharura kwa wanawake wajawazito, kuhimiza
Halmashauri zote kuweka kipaumbele kwenye uzazi salama na kushirikisha wananchi
na jamii kwa ujumla juu ya kutokomeza vifo vya wanawake vitokanavyo na uzazi.
Tuige mfano wa wananchi wa kijiji cha Utulo, katika Halmashauri ya Wilaya ya
Mbarali Mkoani Mbeya. Wananchi wa kijiji hicho wameweka mikakati ya kudhibiti
vifo vya watoto wachanga katika jamii yao ambapo toka mwaka 1998 hakuna vifo
vitokanavyo na uzazi vilivyoripotiwa katika Zahanati ya kijiji hicho.
Mwisho:
Wizara
imeanza kutoa taarifa kila baada ya robo mwaka ya vifo vitokanavyo na uzazi.
Nasisitiza kwamba kila wilaya iwasilishe Wizarani taarifa ya vifo vitokanavyo
na uzazi kila wiki pamoja na taarifa ya (Infections Disease Week Ending - IDWE), Kwani ni mojawapo ya chanzo cha
takwimu zinazotumika kuandaa taarifa ya robo mwaka.
Baada
ya kusema hayo machache, sasa niko tayari kuzindua wodi ya wazazi,
iliyokarabatiwa na Shirika la Jhpiego
ASANTENI
KWA KUNISIKILIZA.
Post a Comment