MAAFA YAENDELEA KUIANDAMA WILAYA YA KYERWA MKOANI KAGERA WANANCHI WATAHADHARISHWA

Wilaya  ya  Kyerwa mkoani  Kagera  imeendelea  kukumbwa  na  janga  la  maafa  kutokana  na  mvua  za  msimu  wa  masika  kunyesha  huku zikiambatana  na  upepo  mkali  kuangusha  migomba  na  kuezua  nyumba  za  wananchi  katika  maeneo  kadhaa  ya  wilaya  hiyo.

Mvua iliyonyesha  jana  katika  kijiji  cha  Nshunga  kata  ya  Kyerwa  imekuwa  mwendelezo  wa  maafa  huku pia  ikisababisha  maafa  kama  hayo kwenye  kijiji  cha  Ruhita  kata  ya  Kamuli.

 

Wenyeviti  wa  vijiji  hivyo  wakiongea  kwa  nyakati  tofauti    wamesema  kutokana  na  maafa  hayo  wananchi  wa  maeneo  yao  hawana  budi  kulima  mazao  yanayostawi  kwa  muda  mfupi  ili  kujikinga  na  janga  la  njaa  kwani  wengi  wao  hutegemea  migomba  kupata zao la  ndizi  ambalo ni  chakula  chao  kikuu.

 

Mwenyekiti wa serikali ya kijiji cha Ruhita kata  ya Kamuli Wilayani Kyerwa Salvatory Baziwani , akizungumza na chombo hiki kwa njia ya simu  mapema leo ,amesema mvua iliyonyesha jana kwa kuambatana na upepo na mawe,imeezua baadhi ya nyumba na kuharibu migomba  na kuwaacha wakazi hao katika hali ya wasiwasi namna  watakavyopata chakula.

Wananchi wa Ruhita kata kamuli wameeleza masikitiko yao juu ya mvua hizo,kwani wakati inaanza kunyesha ilionyesha haina upepo mkali na badaye iliongezeka kwa kuambata na mawe makubwa ambapo wameiomba serikali kuangalia msaada unaowezekana hususani chakula hata kama sio wakati huu lakini kuwaweka katika mpango wa namna gani watakavyojikimu kwa mda mfupi ujao.

Naye  Mwenyekiti  wa  serikali  ya kijiji  cha Nshunga  kata  Kyerwa Gerad Colonery amesema kuwa  Idada ya Nyumba  zilizoezuliwa na upepo na mazao kuharibiwa  kufuataia Mvua kubwa iliyonyesha jana majira ya saa 9 alasiri  ikiambatana na upepo mkali na mawe   imezidi kuongezeka baada ya kubainika vitongoji vingine 2 vilivyokubwa na maafa hayo katika kijiji cha  hicho.

Ametaja  vitongoji  vilivyoongozeka kuwa  ni Nshunga na Songa Mbele ambapo vilivyoripotiwa awali vilikuwa  Viwili  Kitongoji cha Nyakagera na Omukishanda Stesheni   hivyo kufanya idadai ya vitongoji 4 vilivyokumbwa na maafa hayo kati vitongoji 6 vinavyounda kijiji hicho.

 Mwenyekiti huyo amethibitisha kuwepo majeruhi wawili ambao ni watoto walioangukiwa na Tofali za Nyumba japo hawakupata majeraha makubwa.

Amesema  usalama wa wananchi na mali zao umeelezwa kuimarika kwa  kuwa  kijiji  kimejipanga  kuepuka  wizi  au  udokozi  wowote  ule  katika  kipindi hiki.

Mwenyekiti wa  kijiji  cha  Nshunga  kata  ya  Kyerwa  amesema  kwenye  kijiji  chake  kamati  ya  maafa  ya  kata  inaendelea na  tathimini  na  majibu  rasmi  yatatolewa  kesho  na   kuongeza  kuwa  mikakati iliyopo  wakati  wananchi  wakisubilia  hatua  nyingine  amsema  amejipanga kuitisha  mkutano  wa  Alhamisi  wiki  hii  kuweka  mpango.

Hata  hivyo  maafa  kwa  kipindi  cha  kuanzia  machi 29  mwaka  huu yameripotiwa  kutokea  katika  maeneo  kadhaa  ya  wilaya  ya  Kyerwa kwenye  kijiji  cha  Kigorogoro kata  ya  Kibale.