WANANCHI WAMTAKA MKUU WA WILAYA KUACHA UBABE BADALA YAKE ATUMIE MARIDHIANO

 Wananchi  wa  kijiji  cha  Kishoju  Kata  ya  Kihanga  wilaya  ya  Karagwe  Mkoani  Kagera  wameomba  mkuu  wa  wilaya  ya  Karagwe  kutumia  njia  ya  maridhiano  ya  kumaliza  mgogoro  wa  ardhi ya  kijiji  na  Dayosisi  ya  Karagwe  unaoendelea  kuliko  kutumia  nguvu  na  ubabe  ambao  hauwezi  kuleta  ufumbuzi  wa  kutatua  mgogoro  huo.

 Wakiongea na  timu  ya  waandishi  wa  habari  wa  vyombo  mbalimbali  waliotembelea  maeneo  yote  yenye  mgogoro  wananchi  hao  wamesema  kuwa  wao  hawakatai  maendeleo  hata  chuo  kikuu kinachojengwa  wanakihitaji  ila  kinachohitajika  ni  kufuata  utaratibu  na  haki  yao  isiporwe   kwani  wapo  maeneo  hayo  zaidi  ya  miaka  30.

Wananchi  hao  wamedai  kuwa  mkuu  wa  wilaya  badala  ya   kutumia  njia  ya  kukaa  meza  moja  na  uongozi  wa  serikali  ya  kijiji  lakini  wameshughudia  vitisho  vya  kutumia  askari  na  ofisi  ya  ardhi  wilaya  kutaka  kufanya  upimaji  wa  ardhi  bila  kushirikisha  uongozi  wa  kijiji   ambao  ndiyo  wenyeji  wa  maeneo  hayo.

 Diwani  wa  Kata  ya  Kihanga  Rwamuhangira  Steven  Mgasha  amesema  kuwa  kuna  dhana  inapitishwa  kuwa  wananchi  wa  kihanga  hawapendi  ujenzi  wa  chuo  kikuu    ameongeza  kuwa  hiyo  inatumika  kupoteza  hali  halisi  ilivyo  kwani  na  wao  wanahitaji  maendeleo  na  pia  ujirani  mwema  ila  wanachohitaji  na  utaratibu  wa  kutoonea  mtu  na  maendeleo  yawe  ya  wote.

Mwenyekiti  wa  Kijiji  cha  Kishoju  Dawson Bampabula  amesema  serikali  ya  kijiji  inashindwa  kuendesha  shughuli  zao  kwa  uhakika  kutokana  na  vitisho  vinavyotolewa  na  mkuu  wa  wilaya  ya  Karagwe  Deodatus  Kinawiro  hadi  kufikia  kuwaweka  ndani  kwa  madai  kuwa  wao  ndiyo  wanachochea   mgogoro  pia  kwa  kile  alichoeleza  kuwa  walishindwa  kutekeleza agizo  la  kugawa  ardhi  wakati  wao  hakuna  mwananchi  ambaye  walishawahi  kumnyanganya  ardhi.

Mkuu  wa  wilaya  ya  Karagwe  alipofuatwa  na  waandishi  wa  habari  kujibu  madai  hayo  ya  wananchi  amejibu  kwa  ufupi  na  kuatia  maelezo  kuwa  mgogoro  huo  ameisha  umaliza  na  tayari  amefunga  mjadala  huo  na  kuongeza  kuwa  Dayosisi  ya  KKKT  Karagwe  wanamiliki  kihalali.

Kwa  upande  wake  katibu  Mkuu  wa  Dayosisi  ya  KKKT  Karagwe  Mchungaji  Anaceth  Magayane  akiongea  na  waandishi  wa  habari  amesema  kuwa  dayosisi  hiyo  inamiliki  ardhi  hiyo  kihalali  na  walipewa  mwaka  1980