WANANCHI WAPONGEZWA KWA KUCHANGIA MADAWTI

Wananchi na wadau wa maendeleo wilayani Karagwe mkoani Kagera wamepongezwa kwa jitihada zao za makusudi waliozoonesha katika kuchangia suala zima la madawati, ambapo hadi sasa kata zote za wilaya ya Karagwe zimefikisha madawati 2,324 huku halmashauri ikiwa imeshatoa madawati 500.

Pongezi hizo zimetolewa  leo na mwenyekiti wa halmashauri ya wilaya ya Karagwe mkoani Kagera Wailess Mashanda wakati akiongea na KARAGWE FORUM ofisini kwake.

Mashanda amesema kuwa wananchi na wadau wa maendeleo wilayani humu wameoonesha jitihada kubwa za kuchangia madawati japo kufikia juni 30 mwaka huu kama agizo la Rais kuwa wamekamilisha madawati, kwa wilaya ya Karagwe watakuwa hawajakamilisha japokuwa wapo katika harakati za kukamilisha baada ya hapo.

Ameongeza kuwa hadi sasa zoezi la ukusanyaji wa mbao na boriti linaendelea huku waliotoa ahadi za kuchangia madawati nao wakiwa wanaendelea kutoa michango yao ili kuhakikisha shule zote za  wilaya ya Karagwe zinapata madawati ya kutosha.

Hata hivyo Mashanda amewataka wananchi ambao bado hawajachangia mchango huo wa madawati kuhakikisha wanachangia na kufikia malengo walioyojiwekea katika vijiji,vitongoji na kata kwa ujumla.

Katika hatua nyingine Mashanda amezungumzia kuteuliwa kwa mkurugenzi wa halmashauri ya wilaya ya Karagwe Mhandisi  Richard Ruyango  kuwa mkuu wa wilaya ya Muleba na kuhamishwa kwa mkuu wa wilaya ya Karagwe Deodatus Lucas Kinawiro kuwa mkuu wa wilaya ya Bukoba.