JAMBO BUKOBA YAKABIDHI VISIMA VIWILI VYA MAJI SHULE YA MSINGI KAARO

Shirika  la  Jambo   Bukoba  linalohusika  na  kuendeleza  michezo  kwa  shule  za  msingi  mkoani  Kagera  leo  limekabidhi  mradi  wa  visima  viwili  vya  maji  vyenye  ujazo  wa  lita  70792  Vilivyogharimu zaidi ya  shilingi    milioni 21 katika  shule  ya  msingi  Kaaro  ya  wilayani  Kyerwa  mkoani  Kagera.

Akitoa  maelezo  ya  chimbuko  la  mradi  huo   mwalimu  mkuu  wa  shule  hiyo  Deodatus  Daudi   amesema  ufadhili  huo  ulitokana  na  shule  hiyo  kushiriki  michezo  ambayo  inaandaliwa  na  shirika  hilo  la  Jambo  Bukoba   ambapo  shule  hiyo  ilifanikiwa  kushinda  kwa  ngazi  ya  wilaya  na  kupata  nafasi  ya  kushiriki  bonanza  la  mkoa  ndipo  wakapata   mradi  huo.

Meneja  mradi  wa  shirika  la  JAMBO  BUKOBA   Beatrice    Mbehoma  Bujune  ambaye  alimwakilisha  Imani   Paulo  ambaye  ni  msimamizi  wa  wilaya  za  Kyerwa  na  Karagwe  amewataka  wanafunzi  pamoja  na  jumuia  ya  shule  ya  msingi  Kaaro  kuvitunza  visima  hivyo   ili  viweze  kutimiza  lengo  kuu  la  kuwasaidia  wanafunzi  kuepukana  magonjwa  yatokanayo  na uchafu.

Amesema  kuwa  JAMBO  BUKOBA    inahamasisha  ushiriki  wa  jamii  ili  kuweza  kuleta  ufanisi  wa  miradi  hivyo  wakitunza  visima  hivyo  itasaidia  kwa  kiwango  kikubwa  katika kuwaepusha  wanafunzi  na  uchafu  usababishwao  na  kukosa  maji shuleni hapo  na  lengo  amesema  ni  kuwasaidia  kuwa  na  mazingira  bora  ya  kujifunzia  kwa  kuwa  na  afya  bora.

Mgeni  rasmi   Silvester     Machera   ambaye  ni  Afisa    Takwimu  na  Vifaa  wilaya  ya  Kyerwa  akimwakilisha    Mkurugenzi  Mtendaji  wa  wilaya  ya  Kyerwa  amewataka  walimu,wanafunzi,Kamati  ya  shule   pamoja  na  wanafunzi  kutunza  visima  hivyo  vilivyojengwa   kwa  ufadhili  wa  Shirika  la  Jambo  Bukoba  ambao  wametoa    asilimia  75  ya  mradi  huo  na  jamii  ikichangia  asilimia  25  za  mradi  huo  wa  visima  viwili.

Naye  diwani  wa  Kata  ya  Nkwenda    Majaliwa  John  ameiomba  serikali  kubadili  mfumo  wa  kutoa  zawadi  ya  barua  au   ngao  wanapofanya  vizuri kwenye  taaluma  na  badala  yake  waige  mfano  wa  jambo  BUKOBA  wa  kutoa  mradi  ambao   unahamasisha  shule  nyingine  kufanya  vizuri.

Aidha  wanafunzi  nao  walikuwa  na  maoni  juu  ya  kukamilika  mradi  huo  wa  visima  kwasababu  walikuwa  na  shida  kubwa  ya  maji  shuleni  hapo  kabla  ya  kupata  mradi  huo.

Mradi  huo  wa  visima  viwili  vya  maji  vimegharimu  zaidi ya shilingi  milioni 21 Shirika  la  Jambo  Bukoba  limechangia   sh milioni  15,971,250,    Sawa  na   asilimia 75   na  jamii  ilichangia  shilingi 5,325,750 sawa  na  asilimia  25 za  miradi hiyo  ya  visima  viwili.

Hata  hivyo  wanafunzi  na  wazazi  wa  shule  hiyo  ya  KAARO  wameonesha  furaha  yao  kwa  kukamilika  ujenzi  huo  wa  visima  huku  wakiomba  shirika  la  Jambo  Bukoba  kuendelea  kuwaunga  mkono  kwani  bado  wanazochangamoto  nyingi.