Waziri wa Afya, Maendeleo ya
Jamii, Jinsia, Wazee na Watoto Mhe. Ummy Mwalimu ametoa wito kwa watanzania
hasa Wanakagera kurejerea moyo wa uzalendo na kupendana kwa kuwatunza Wazee
bila kuwatelekeza katika Makazi ya kuwatunza wazee ambao hawajiwezi kwa sasa na
wanahitaji msaada wa karibu.
Waziri Ummy aliyasema hayo
alipotembelea Makazi ya kuwatunza wazee Kiilima Wilayani Bukoba Mkoani Kagera katika
ziara yake tarehe 16.07.2016 na kujionea
changamoto mbalimbali zinazoyakumba makazi hayo ambayo yapo chini ya Wizara
yake.
Waziri Ummy, alitoa kauli
hiyo kwa jamii hasa kwa wakazi wa Mkoa wa Kagera kuyatembelea makazi hayo na kuwafariji
wazee hao ambao wanahitaji jamii kuwajali mara baada ya kuwahoji baadhi ya
wazee wa Makazi ya Kiilima hasa mara baada ya baadhi ya wazee kumweleza kuwa
waliletwa na watoto wao wenyewe na kuwatelekeza katika makazi hayo.
Ili kutatua changamoto za
makazi hayo ya Kiilima Waziri Ummy alisema kuwa Wizara yake imetenga bajeti ya
shilingi bilioni 2.4 kwa ajili ya chakula na
kukarabati Makazi 17 ya wazee nchini lakini alisema tayari amemwagiza
Katibu Mkuu wa Wizara kutembelea makazi yote na kuona yale ambayo yana hali
mabya ili yahudumiwe kwanza.
“Tutachukua hatua za Haraka
sana makazi haya ya Kiilima yana hali mbaya sana na changamoto zake ni kubwa
kuliko sehemu nyingine lakini nikifika Wizarani nitamwagiza Katibu Mkuu
ahakikishe angalau anaanza kuwajengea vyoo wazee hawa ili kuwanusuru maana hali
ni mbaya sana hapa.” Alisema Waziri Ummy.
Aidha, Waziri Ummy
aliwaagiza Maafisa Ustawi wa Jamii kuwatembelea wazee hao mara kwa mara ili
kuwapatia msaada wa kisaikolojia na kutambua Wazee ambao bado wanao ndugu na
jamaa waweze kusaidiwa i kurudishwa kwa ndugu na jamaa zao.
Pia Waziri Ummy Mwalimu alisema kuwa kwasasa
Wizara yake imeamua kubadilisha jina badala ya kuendelaea kuitwa Vituo vya kuwatunza Wazee sasa yanaitwa Makazi ya
wazee, jina la “vituo” ilionekana kuwa ni kama kuwanyanyapaa wazee hao.
Changamoto zinazoyakabili
makazi ya wazee Kiilima ni ubovu wa miundombinu kama vyoo, bweni moja ndilo
linalotumika la wanawake badala ya mabweni mawili, majengo yote yamechoka
yanahitaji urabati pia kuna tatizo la uhaba wa chakula, huduma za afya na usafiri
wa kuwasafirsha Wazee kwenda kwenye matibabu, aidha, watumishi wa kituo hicho
hawatoshi.
Makazi ya Wazee Kiilima yanawatunza
Wazee 18 Wanawake 4 na Wanaume 14. Wazee hao walimshukuru Mhe. Waziri Ummy kwa
kuwatembelea na kujionea changamoto walizo nazo katika makazi yao, pia
walimshukuru mlezi wao Bi Gladness Rwiza kwa kujitoa kwa hali zote katika
kuwahudumia hasa katika upande wa chakula.
Post a Comment